الدار العجيبة

لدار العجيبة
هذي سنين داري مهجورة ما بقات فيها بانتورة
كبرت فيها الفاتورة كلش منها راهو طار
في الدروج تلقى الشجار بين الأولاد الصغار
تسمع فيها كل أخبار حتى وش كلا الجار
راني ساكن ذي العمارة والحارة ذي ماهي حارة
الشقلالة في الإنارة وكثر فيها الغبار
تسمع دوي الخباز واحد يبيع الغاز
الدلال يظل وزواز قالك كيسان الفخار
الحيط جيهاتو محفورة ما لصقت فيه حتى صورة
كي ندخل تجيني فورة كي نشوف لذاك الكولوار
الندى في سقف الجدار انحوه مصالح كبار
الماء يسيل من عند الجار نجمع فيه بالقازار
البلاط كل يوم يتكسح لكن لونه ما يتفتح
أنبوب ما يجي يسرح غير بالسلوك الكبار
الناموس علينا إفوت في أفريل قبل أوت
القرلو غزا البيوت يمشي قدام الأنظار
الفار راه داير تخطيط رجع الكتب كي القوفريط
و الشقة مافيها قطيط صفر صفر يا صفار
درنا الغبرة و المبيد كافور و قارص جديد
حاجة ما عادت تفيد حتى زادنا الدمار
الطيقان ما تسكر لوحها راه قا يثنثر
طبع زجاجة تتكسر ما يبقى فيها مسمار
طاروا زكارم البيبان واللوح عاد كالكتان
م الفتحة الباب يبان حتى المزلاج راهو طار
نحينا بالكو الكوزينة كانت فيها شبه جنينة
حطينا فيها الماشينة ما غسلت حتى إزار
الغرفة ما فيها شروق و الخيوط فيها شقوق
الريدو عاد كي العبروق وابقى منه قا التصوار
الخزاين بلا مفاتيح القش منها راه يطيح
و الوقت اللي يجي الريح تتقلب كل الأدوار
انا نشوف نشرة لخبار وما يجري ورا البحار
كاش فيلم على الأحرار يخي نحونا الرادار
البريز ماهوش في مكانه خيوطو خرجوا كي البيانو
حتان راحت الوانه اذا تمس يضرب التيار
المصباح كل يوم يتبدل تقولشي راني في معمل
كي يجي الليل هو ما يشعل نجيب شمعة ولا فنار
كي نجي ننشر في الحواله نفتح الطاقة في الصالة
العسة عليهم بالدالة لا يصبحوا على الأشجار
الكتب من الضيق عواجوا نصفهم مرمي في كاجو
البيفي طارو ادراجو ما خدمو حتى نجار
حصلنا في ذا الضيق كل ما في الدار رقيق
لذا الحالة شوكن يطيق ما نبغيها للأشرار
من كثرة ماني نفكر جاني الضغط و السكر
دمي يغلي عاد مفور كي ندخل لهاذ الدار
بعتها بنص السومة وبدلت هاذ الحومة
الحالة راها معلومة مع ارتفاع الأسعار