قضيت دراهم البيت****حصلنا في المديونية
عدت كي شبه بطال*****نحلم بخمسين ريال
نبحث في جيب السروال***كاش عشيرة منسية
راني مليت التهميش****كلش راهو بالبقشيش
مليت كلمة معنديش****ورواح عندو العشية
اقصدت عمر إدريس*نحسب روحي في التدريس
جابولي صفحة رفيس*** سرحوني م التربية
نتفكر في الذكريات*****الفتيان والفتيات
قالوا روح اشري فيات**** وتبدل للمدية
رحت بعت ثلاجة*** باش نشري دراجة
جابت قيمة دجاجة*** بلا كمون وكروية
بعت خزاين بمليون *وبقى لقش في كرطون
عدت في غرفة مسجون***وحوالايا مرمية
الذبان والفيران***** حشرات بكل الوان
ماخلاونا كتان***** لابريق ولاصينية
راه تكسر الزجاج *والباب ماعندو مزلاج
الطيقان بلا سياج* الحيوط ماهي مطلية
كي السقف عني سال* عادت الدار ق أوحال
سكنت في الكازورال*** في غرفة فردية
هربت من حي غريسي** قابلني منا الليسي
و قصعة ام بي سي*** يحركها الريح شويه
انهار الي يجيني سمسار*** نفرح كي يقلي ع الدار
والمشتري في فرار* اريد سومة دونيه
انهار الي الماء يجي* نروح للموتور انبرجي
نجري بمفتاح في لدروجي* والفتلة تمكر فيا
طامع في هتاف نقال* نحكي فيه على الاحوال
انسيت واحد راه يسال* ماخلى ميزانية
نضل نمشي في لبولفار* م الفجر لاخر نهار
هارب من بعض لتجار* في لطرق لملوية
ذا خباز ذا خضار* ذا حانوت حالة مكار
قالوا مانوخر دينار* الحسابات الشهرية
نروح نشري خبر مطروش* وندهمي مقهى لعروش
كاش مااجي واحد فحشوش* يسلك قهوة العشية
نقعدنقعد ثم نتأمل* كاش مانشري محل
قالوا لي روح اعمل* ذي احلام وردية
راني حصلت في الديون* والبني بستين مليون
عدت تعبان ومغبون* مالقيت حتى سلفية
قالوا بعض الناصحين* روح ألف مع التلحين
راك تعبت من الروتين *دير دروس خصوصية
كل يوم نراقب الباب كاش* واحد يقرا الآداب
قالوا راح وقت الكتاب* هات حوايج علمية
الحل في دعم الفلاح *يغرس أشجار التفاح
ثم الواحد يرتاح* في أراضي مسقية
الحل كي نطبع كتاب* نتناقش مع الأصحاب
أنشوف الطلبة الشباب* عندهم روح الوطنية
Aucun commentaire:
Enregistrer un commentaire